რუსეთის ორ რეგიონში საბრძოლო მასალების საწყობებზე უკრაინული დრონებით შეტევის შედეგებზე მსჯელობის საშუალებას იძლევა სხვადასხვა კომპანიის მიერ კოსმოსიდან გადაღებული ფოტოები. კრასნოდარის და ტვერის ოლქებში რუსეთის თავდაცვის სამინისტროს ობიექტებზე იერიში 21 სექტემბერს განხორციელდა. რადიო თავისუფლების რუსულმა სამსახურმა გამოაქვეყნა კომპანია Sentinel Hub-ის სატელიტური ფოტოები, რომლებზეც ასახულია კრასნოდარის მხარის ქალაქ ტიხორეცკთან მდებარე საბრძოლო მასალების საწყობი 20 და 21 სექტემბერს, ობიექტზე უკრაინული დრონებით შეტევამდე და შეტევის შედეგად გამოწვეული ხანძრის შემდეგ. აშშ-ის მონაცემებით, რუსეთი უკრაინის წინააღმდეგ ომში გამოყენების წინ, ამ საწყობში ინახავს ჩრდილოეთ კორეისგან მიღებულ საბრძოლო მასალებს. три კომპანია Planet Labs-ის სატელიტური ფოტოების მიხედვითაც, 20 სექტემბერს ტიხორეცკის მახლობლად მდებარე ობიექტზე ჩანს ხელუხლებელი ნაგებობები, ხოლო 21 სექტემბრის ფოტოზე ასახულია კვამლი და ხანძრის სავარაუდო კერები. BBC-ს ვერიფიკაციის სამსახურმა დაადასტურა, რომ ორივე ფოტო გადაღებულია ტიხორეცკთან მდებარე დაბა კამენნიში, სადაც რუსეთის საბრძოლო მასალების საწყობი მდებარეობს. რადიო თავისუფლების რუსულმა სამსახურმა გამოაქვეყნა რუსეთის ტვერის ოლქის დაბა ოქტიაბრსკიში მდებარე, რუსეთის თავდაცვის სამინისტროს მთავარი სარაკეტო-საარტილერიო სამმართველოს 23-ე არსენალზე დრონებით შეტევიდან მეორე დღეს, 22 სექტემბერს, გადაღებული სატელიტური ფოტოებიც. ამ მასალის მიხედვით, ტერიტორიის ჩრდილოეთ ნაწილში სრულად დამწვარია საბრძოლო მასალების საცავების ნახევარზე მეტი, სამხრეთი ნაწილი კი პრაქტიკულად ხელუხლებელია. три ოქტიაბრსკის სამხედრო ობიექტი განთავსებულია ტვერის ოლქის ქალაქ ტოროპეცის სიახლოვეს. 18 სექტემბერს უკრაინული დრონებით შეტევა იყო ტოროპეცში მდებარე საწყობზეც. უკრაინის უსაფრთხოების სამსახურში განაცხადეს, რომ ტოროპეცში წარმატებით შეუტიეს და გაანადგურეს რუსეთის თავდაცვის სამინისტროს მთავარი სარაკეტო-საარტილერიო სამმართველოს დიდი საწყობი, სადაც ინახებოდა ოპერატიულ-ტაქტიკური კომპლექსების, „ისკანდერის” და ტაქტიკური სარაკეტო კომპლექსების, “ტოჩკა უ-ს" რაკეტები, საავიაციო ბომბები და არტილერიის საბრძოლო მასალები. ასევე ნახეთ უკრაინის უსაფრთხოების სამსახურში ადასტურებენ დარტყმას რუსული რაკეტების საწყობზე რუსეთის თავდაცვის სამინისტროს თავის საწყობებზე უკრაინული დრონებით შეტევების შესახებ არაფერი უთქვამს. ...