ამერიკულმა კომპანია Meta-მ თავის პლატფორმებზე სრულად დაბლოკა რუსეთის სახელმწიფო მედიაჯგუფი „როსია სეგოდნია“, ტელეარხი RT და მათთან კავშირის მქონე სხვა ორგანიზაციები. Meta ფლობს Facebook-ს, Instagram-ს, Threads-ს და WhatsApp-ს. Meta-მ კრემლის პროპაგანდისტული მედიასაშუალებების წინააღმდეგ ზომები გააფართოვა ე.წ. გავლენის ოპერაციის და უცხოეთში მათი ჩარევის მცდელობების გამო. რუსეთის პრეზიდენტ პუტინის განკარგულებით 2013 წელს შექმნილი მედიაჯგუფი აერთიანებს სააგენტო „რია ნოვოსტის“, სააგენტო და რადიო „სპუტნიკს" და სხვა პროპაგანდისტულ მედიასაშუალებებს და საინფორმაციო პორტალებს ათეულობით ენაზე. რუსეთის მთავრობა აფინანსებს სხვადასხვა ენაზე მაუწყებელ ტელეარხ RT-საც. მედიაჯგუფის გენერალური დირექტორი დმიტრი კისელიოვია, ხოლო მთავარი რედაქტორი - მარგარიტა სიმონიანი, რომელიც RT-საც ხელმძღვანელობს. კრემლის მიერ შექმნილი და დაფინანსებული მედიასაშუალებები და მათი ხელმძღვანელები უკრაინაში რუსეთის შეჭრასთან დაკავშირებული დეზინფორმაციის გავრცელებისა და პროპაგანდისთვის სანქცირებული არიან აშშ-ის, ევროკავშირის წევრი ქვეყნების და კანადის მიერ. ასევე ნახეთ აშშ სანქციებს უწესებს RT-ს, "რია ნოვოსტის" და მარგარიტა სიმონიანს ორი წლის წინ, უკრაინაში რუსეთის ფართომასშტაბიანი შეჭრის შემდეგ, კომპანია Meta-მ რუსეთის ამ სახელმწიფო პროპაგანდისტული საშუალებების წინააღმდეგ ნაკლებად მკაცრი ზომები მიიღო, აუდიტორია შეუზღუდა და თავის პლატფორმებზე მათი რეკლამა აკრძალა. რუსეთის ხელისუფლებას Meta „ექსტრემისტულ ორგანიზაციად" ჰყავს გამოცხადებული. Meta-ს მიერ კრემლის პროპაგანდის გამავრცელებელი მედიასაშუალებების წინააღმდეგ ზომების გაფართოებას წინ უძღოდა ამერიკის შეერთებული შტატების მიერ სექტემბრის დასაწყისში ამოქმედებული ახალი სანქციები. ვაშინგტონმა კრემლის მიერ დაფინანსებული ტელეარხი RT და მისი ხელმძღვანელები, მათ შორის მარგარიტა სიმონიანი, დაადანაშაულა დეზინფორმაციის გავრცელებით აშშ-ის მომავალ საპრეზიდენტო არჩევნებზე გავლენის და მისდამი ნდობის შერყევის მცდელობაში. ...